Quintana Garrido, Xosé Ramón
(Ourense, 1957) é profesor asociado de Historia Contemporánea da Universidade de Vigo e profesor de ensino secundario. Especialista en historia política do tempo presente, historia social e historia da historiografía, é autor e coautor de numerosos estudos e artigos, publicados en obras individuais ou colectivas e en revistas especializadas. Alén dos dedicados ao novo nacionalismo galego, entre eles destacan Ramón Otero Pedrayo. Vida, obra e pensamento (1988), "Renovación en la historiografía española: Antonio Eiras Roel y la recepción del movimiento Annales en Galicia" (1995), "O poder dos actores: o renacemento da Historia Política" (1998), "Acción colectiva en pequeñas urbes: Estrategias obreras, patronal y autoridades públicas" (1999), e Diario de empresa e xornalismo cívico: Galicia. Diario de Vigo, 1922-1926 (2002).

Valcárcel, Marcos
(Ourense, 1958-2010), historiador, xornalista e activista cultural, foi un dos fundadores do Club Cultural Alexandre Bóveda de Ourense. Nos seus traballos dedicouse á historia do xornalismo e ás biografías de Ferro Couselo, Xaquín Lorenzo e Carlos Casares, entre outros. Creou o blog cultural e de actualidade As uvas na solaina, que obtivo moita sona e éxito de público. Recibiu numerosos galardóns, entre eles a Medalla Castelao en 2009. Das súas obras destacan: A prensa en Ourense e a súa provincia. Catalogación e estudio (1987), A cidade da xeración Nós (1996), Carlos Casares, punto de encontro (2002), O poder da palabra (2006) e Historia de Ourense (2008).