25,95€

mercar

Máscaras rotas para Sebastian Nell

Alberto Ramos

Premio de Novela Manuel García Barros 2014

Editorial Galaxia publica Máscaras rotas para Sebastian Nell, novela coa que Alberto Ramos obtivo o Premio García Barros do ano 2014. A obra premiada no certame que organiza o Concello da Estrada en colaboración coa Secretaría Xeral de Política Lingüística trátase dunha novela que combina distintos tipos de escritura nos que a materia narrativa se une co xénero da entrevista.
En opinión do xurado, nesta obra de Alberto Ramos destaca a grande orixinalidade da disposición do material narrativo e a caracterización do seu protagonista. Introdúcesenos nunha poderosa historia protagonizada por un actor inglés nas súas derradeiras horas; Sebastian Nell lembra os seus días, cheos de luces e sombras, diante dunha xornalista coa que mantén unha entrevista longa. Polo camiño vai aboiando todo un mundo de miserias persoais e profesionais, de envexas e iras que tracexan un retrato intenso e non sempre agradecido do difícil universo do teatro e do cinema.
Ao final da súa vida, e tras recibir o diagnóstico do alzhéimer, o actor británico Sebastian Nell concédelle unha única entrevista á xornalista Rebecca Graham. Nas longas horas de conversa, o actor percorre a súa traxectoria teatral en Gran Bretaña e a súa carreira cinematográfica en Hollywood. Retrata así, con nostalxia e ao tempo desarraigamento, os falsos brillos da sociedade do espectáculo. Mais non só, porque do pasado de Sebastian Nell tamén xorden os bombardeos de Londres na Segunda Guerra Mundial, a enfermidade, a miseria, o amor, un particular sentido da historia contemporánea e un desexo impúdico de contar. Alberto Ramos fai nesta novela unha radiografía dos claroscuros do século XX a través do diálogo punzante e inclemente de dous personaxes que intentan descubrir quen é cadaquén. E onde nada é nunca o que parece.

Recensións


Detalles

  • Páxinas : 404
  • Deseño : Rústica con lapelas
  • Dimensións : 135 x 210
  • Data Publicación : 2014-11-14
  • Colección : Literaria
  • Editorial : Galaxia
  • ISBN : 978-98-9865-569-8
  • Edición : 1

Noticias relacionadas


Obras do autor en catálogo


Actividades relacionadas


Novidades

A retranca. Un intento de clarificaciónFélix Caballero Wangüemert
Dos meus recordosManuel García Barros
EnredosManuel García Barros

Autor/a

Ramos, Alberto
(Santiago de Compostela, 1986) licenciouse en xornalismo na Facultade de Ciencias da Comunicación da Universidade de Santiago. Dende 2009 traballou na sección de cultura de Xornal de Galicia, ata o peche da cabeceira, pasando logo a traballar de freelance para diversos medios de comunicación. Combina o traballo de xornalista coa súa faceta literaria. No ano 2006, gañou o Premio Biblos Pazos de Galicia coa novela Dor pantasma. Tres anos despois, obtivo o Premio de Novela por Entregas de La Voz de Galicia coa obra Con acuse de recibo e, en 2012, acadou o Premio Vicente Risco de Creación Literaria coa novela Todos os días, que repetiría en 2017 con A simetría das bestas. En 2014 publicou, con Editorial Galaxia, Máscaras rotas para Sebastian Nell, Premio de Novela García Barros.


Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR