Os Premios Follas Novas do Libro Galego veñen de facer pública a primeira selección de obras candidatas á edición de 2026, un paso decisivo dun proceso que culminará coa gala de entrega o vindeiro 9 de maio de 2026, no Teatro Principal de Santiago de Compostela.
Os galardóns, organizados pola Asociación de Escritoras e Escritores en Lingua Galega (AELG), a Asociación Galega de Editoras (AGE) e a Federación de Librarías de Galicia (FLG), recoñecen a excelencia do traballo editorial realizado en Galicia ao longo de 2025.
A primeira fase do proceso partiu dunha preselección realizada polas entidades convocantes, da que saíu un listado definitivo de seis obras por categoría. A partir deste listado, os distintos xurados escollerán tres finalistas por categoría antes da resolución final.
As obras de Editorial Galaxia seleccionadas
Editorial Galaxia conta cunha presenza destacada nesta primeira selección, con títulos incluídos en varias categorías:
Ensaio e investigación
- As tolas que non o eran. Mulleres no manicomio de Conxo 1885–1936, de Carmen V. Valiña
- Literatura insólita, de Armando Requeixo
Divulgación
- Contáronme un conto mal contado. Onde estaban as mulleres na historia?, coord. Susana Reboreda Morillo
Narrativa
- Punto de araña, de Nerea Pallares
- Son como glaciares os barcos de aceiro, de Cynthia Menéndez
Literatura infantil
- Bonecas, de Raquel Castro e Komorevi
Literatura xuvenil
- Unha historia de amor coma outra calquera, de Rosa Aneiros
Banda deseñada, libro gráfico e humor
- Adelina, de Sandra Lodi
- Rosalía Oculta, de Paula Mayor
Obra traducida
- Brevísima historia do conflito entre Israel e Palestina, de Ilan Pappé, tradución de Carlos Aymerich
Teatro
- O proceso. Apago o candil, de Cándido Pazó
- Os rapaces só se tocan para darse de hostias, de Iván Caloto
O proceso continuará nas vindeiras semanas coa elección das obras finalistas. Ata entón, celebramos este primeiro recoñecemento e o camiño compartido coas autoras e autores que fan posible un catálogo vivo e diverso.