Este blog, en realidade, é un completo xornal electrónico que, ademais de ofrecer as anotacións que irán dando conta do día a día da editorial, será tamén unha fonte de información, opinións, debate e interacción. Nace ao mesmo tempo que se renova o noso portal, agora máis interactivo e con máis servizos.
O blog da Editorial Galaxia conta cunha serie de seccións que están chamadas a ser referencia para os internautas interesados pola cultura de Galicia. Ademais dos post do día, conta cunha sección de Artigos de opinión onde as xentes da cultura de Galicia irán ofrecendo a súa visión sobre os temas de actualidade cultural máis candentes do momento. Por outra banda, a páxina ofrece tres novidosas seccións chamadas Balcón de Libros, Ópera Prima e Galería de Arte.
No Balcón de Libros, creouse un espazo no que os autores da Editorial Galaxia poderán encontrarse cos lectores. Trátase, xa que logo, dun blog dentro do blog. Desde a semana que vén, o escritor Xesús Constela Doce, recentemente galardoado co Premio García Barros de Novela pola súa obra Shakespeare destilado manterá este espazo no que falará cos internautas do seu libro, a súa confección, contestará ás preguntas que se lle planteen desde a rede… En definitiva, un espazo virtual de encontro entre creadores e lectores para darlle vida e visibilidade ás novidades da editorial.
Ópera Prima é un espazo web no que os escritores e escritoras noveis van poder amosar as súas creacións. A rede ábrese así á edición virtual ao mesmo tempo que lle dá voz a nomes que queren iniciar, así, a súa andaina literaria.
Finalmente, o blog da Editorial Galaxia ofrece unha completa Galería de Arte na que amosar as creacións artísticas dos ilustradores e ilustradoras de Galaxia, creando un lugar electrónico no que os internautas poidan gozar dunha proposta estética singular.
Ligazóns a outras webs culturais galegas, Revista de Prensa, Arquivo e outras seccións completan a oferta informativa deste blog interactivo que busca ser punto de encontro entre a editorial e os lectores neste novo século.
Esta iniciativa, xunto coa alianza estratéxica con Google Books para a dixitalización de todos os fondos da editorial para a súa consulta en rede, confirman o compromiso da Editorial Galaxia co futuro e a lingua de nós nesta nova realidade global.
