Editorial Galaxia publica na colección Literaria Ronsel Eu son de aquí e de alá, o primeiro libro de narrativa de Tamara Andrés, autora cunha sólida traxectoria como poeta e investigadora, e actual directora da colección Dombate da editorial.
Neste volume, Tamara Andrés vai á procura de Matilde Lloria (1912-2002), poeta que viviu a cabalo entre Valencia e Galicia e que, na España do século XX, desenvolveu unha produción poética en valenciano, galego e castelán. Enfiando as voces de distintas persoas convertidas aquí en personaxes, a autora comparte a súa indagación arredor dunha creadora alófona e migrante, situada nun espazo complexo dentro das historias literarias.
Eu son de aquí e de alá constrúese nun lugar intermedio: é un exercicio de memoria fragmentada, un xogo de espellos e unha pescuda sobre aquilo que queda fóra dos relatos canónicos. Tamén unha man tendida e un intento de reparación.
Nada en Combarro en 1992, Tamara Andrés posiciónase sempre na palabra e na súa medida. Escribe, traduce, ensina, investiga e conta. En 2015 publicou A mentalista, unha homenaxe particular a René Magritte, e ese mesmo ano gañou o Premio de Poesía O Facho con Nenaespirqes. Textos seus foron recoñecidos con diversos galardóns e incluídos en obras colectivas como Winee-Rpses (Le Tour 1987) ou na antoloxía No seu despregar (Apiario). En Editorial Galaxia publicou libros como Corpo de antiochia e Distancias, con Marcos Viso.
Con este libro, Tamara Andrés abre unha nova etapa no seu percorrido literario e confirma unha voz atenta á memoria e ás marxes.