da Silva, Kiko
É un dos máis novos e destacados ilustradores do panorama galego. Salienta pola súa constante procura de novos rexistros e linguaxes frescas, como sucede con ¿Que contan as ovellas para durmir?, un conto de estruturas paralelísticas e acumulativas, habituais na boa literatura para nenos. Tamén ilustrou en Galaxia obras como Dez contos de Andersen. O Concello de Pontevedra e a Rede de Entidades Amigas da Lingua (REAL) concedeulle o Premio Xoán Manuel Pintos 2007 polo "seu compromiso constante co galego, sendo un exemplo de normalidade no uso da nosa lingua desde o mundo da ilustración, do humor gráfico e da banda deseñada".