CEREBRO EN MODO ON
Ilustracións de DIEGO ESTEBO
O que ninguén che contou sobre o cerebro: as emocións, a aprendizaxe, a memoria, os soños ou a saúde mental. Como coidar o cerebro e como fortalecelo. Un libro que pretende explicar o cerebro para a cativada; é iso posible? Poden nenos e adolescentes entender a segreda andamiaxe onde nace a mente? Por suposto que si! Sonia Villapol constrúe unha obra que combina rigor científico e linguaxe accesible, tendendo unha ponte entre a ciencia e a educación para que comprendamos como se forma o cerebro, un órgano extraordinariamente poderoso que fai posibles os nosos complexos comportamentos, pensamentos e accións. A neurociencia, como aquí se amosa, ensínanos que o cerebro se vai esculpindo con cada experiencia: co apoio, coa emoción compartida, coa seguridade e cos hábitos de vida, e, nesta liña, a autora incorpora unha visión actual e necesaria do eixe cerebro-intestino-microbiota, froito das súas investigacións.
(Bretoña, 1977) é neurocientífica no Texas Medical Center de Houston e profesora na Universidade de Weill Cornell, en Nova York. Doutora en Neurociencia pola Universidade Autónoma de Barcelona, nas súas liñas de traballo investiga o impacto da microbiota no cerebro, a nanomedicina en enfermidades neurolóxicas (alzhéimer, ictus, traumatismos cranioencefálicos) e os efectos da Covid persistente. Publicou máis dun cento de artigos científicos e é autora do libro ConSciencia. A ciencia que nos rescatou da pandemia (2023).
