A nacencia do socialismo en Galicia
A amena pluma de Borobó reivindica a galeguidade de Pablo Iglesias e os vencellos que o fundador do Partido Socialista mantivo sempre co seu país natal.
Borobó explica neste libro que Pablo Iglesias regresou en varias ocasións a Galicia con fin de fomentar o incipiente asociacionismo obreiro, tanto sindical como político. As vicisitudes experimentadas polo movemento obreiro galego nos primeiros anos do século XX conforman outro capítulo deste volume, que se completa cunha biografía extravagante do coruñés Ramón de la Sagra.
Raimundo García Domínguez, máis coñecido como Borobó. É unha figura fundamental do xornalismo galego. Naceu en Pontecesures en 1916 e faleceu en Santiago de Compostela en 2003. Na Guerra Civil loitou no bando republicano. Foi director do diario La Noche, no que publicaron as súas colaboracións figuras do galeguismo. Neste xornal publicou os seus "Anacos", crónicas variadas en galego.
Escribiu en varias publicacións de ámbito estatal e dende 1960 dirixiu El Correo Gallego. É autor de numerosos textos, como a comedia Duce, Duce, a narración Fantasma de Valle-Inclán e o estudo A nacencia do socialismo en Galicia. Foi membro correspondente da Real Academia Galega e recibiu, entre outros, os premios Pedrón de Ouro e Julio Camba de xornalismo.
