A monxa e o grumete
Menu
Menu
Aló onde os meandros do Miranda habitan nas branquias das troitas, o ar da Terra Brava insiste en cicatrizar os pousos do alustro que fixeron dunha pel o mapa da melancolía máis atonal, Pedro e María de Miranda Ribadeneyra aprenderon a construír á vez os seus máis lícitos devezos, malia que os lóstregos da inmundicia tratasen de lles esgazar os lamentos. É esta a pintura dun relato propiamente rescatado da memoria familiar, estritamente baseada en feitos reais, agás naqueles fragmentos e imaxes que non o son.
Unha crónica da Galiza rural e escura dos comezos da Idade Moderna, unha analítica das febres das persoas e un apañar polas estradas o anuncio da santidade duns homes, e dunha muller, que só trataron de se explicaren a través da luz do seu instinto. A traxectoria dunha monxa e un grumete que aínda serve para que edifiquemos unha illa enchida onde pór a bandeira que pinta todas as cores do arco da vella.
(Lugo, 1968). Profesor titular da Universidade da Coruña e creador, comezou a publicar na adolescencia. No ámbito académico é a única persoa que no Estado español conta con tres teses de doutoramento defendidas en universidades públicas. A súa produción conta con máis de medio centenar de libros, e numerosos estudos de carácter histórico e crítica literaria en revistas e relatorios en congresos nacionais e internacionais. Publicou varios poemarios e como narrador deu ao prelo coleccións de relatos curtos, ademais da primeira novela pornográfica da historia da literatura galega, que, a pesar de ver a luz no século XXI, foi obxecto de non pouca polémica.
