Manuel Veiga gaña o premio García Barros de novela que un ano máis publicará Galaxia

Categoría: Nova

A novela gañadora do premio García Barros 2006 chegará ás librerías da man de Editorial Galaxia. Lois e Helena buscándose nun día de tormenta, título co que Manuel Veiga acadou este galardón e terceiro publicado polo autor monfortino, caracterízase polo coidado estilístico da prosa e por unha trama narrativa que reflicte a despersonalización da sociedade contemporánea. A historia desenvólvese en Oliveira, trasunto literario da cidade de Vigo, e trascorre ao longo dun só día. Lois e Helena, os protagonistas, son un matrimonio de clase media cunha vida sinxela e sen sobresaltos. Un día calquera, ao espertar, Lois descobre que Helena marchou e inicia entón un periplo pola cidade na súa búsqueda, mentres se pregunta polas razóns da súa fuxida. Na segunda parte da novela a historia cóntase dende o punto de vista de Helena, que reflexiona sobre os motivos que a levan a fuxir. A novela é a historia de dúas persoas que saben que a súa relación non funciona pero non saben os porqués.

En relación coa linguaxe Manuel Veiga define a súa novela como "un texto con moitas proteínas e pouca graxa". Tamén afirma que "sempre fuxo dos lugares comúns e das gorduras: quero que o texto alimente e para iso fago correccións fagan falla".

Agardamos pois ver en papel impreso da man de Editorial Galaxia este texto que concilia sinxeleza e orixinalidade.

O Concello da Estrada coa colaboración da Consellería de Educación e Dirección Xeral de Política Lingüística, a Deputación de Pontevedra e Editorial Galaxia leva 15 anos convocando este premio de novela longa en homenaxe a Ken Keirades. No ano 1989 inicia esta andaina e saca á luz Paisaxe con muller e barco de Manuel Forcadela, ten no seu haber obras como O espírito de Broustenac de Álvarez Cáccamo, Tal vez melancolía de Xosé Carlos Caneiro ou Un nicho para Marilyn de Miguel Anxo Fernández, gañador no 2002.

Comparte nas túas redes sociais ou por email