Hoxe, 23 de febreiro, celebramos o Día de Rosalía de Castro. A capitá das nosas letras.
Tal día coma hoxe, en 1837, nacía en Santiago de Compostela unha das figuras fundacionais da literatura galega e a voz máis poderosa do Rexurdimento. A súa obra, inseparable de Galicia, non só dignificou a lingua: puxo palabras á dor, á emigración, á inxustiza e á dignidade dun pobo.
Autora de Cantares gallegos e Follas novas, Rosalía devolveu o galego á alta literatura tras séculos de escuridade. Comprometida coas clases traballadoras e coa defensa da muller, foi tamén unha das voces máis relevantes do século XIX.
Para celebrala, propoñemos dúas lecturas imprescindibles:
8 Ensaios sobre Rosalía
Co gallo do 75 aniversario de Editorial Galaxia, recuperamos estes ensaios publicados en plena posguerra por autores como Ramón Piñeiro, Ricardo Carballo Calero, Celestino Fernández de la Vega e Domingo García-Sabell, aos que se suma un oitavo ensaio de María do Cebreiro Rábade Villar. Un volume que dá conta da persistencia de Rosalía na memoria cultural galega e confirma que o pasado é sempre unha cuestión do presente.
Rosalía Oculta, de Paula Mayor
Premio Castelao de Banda Deseñada 2023. Unha aproximación gráfica á figura dunha muller avanzada ao seu tempo, que loitou por expresarse nunha sociedade que a censuraba. Un retrato que dialoga co feminismo, coa emigración, coas diferenzas de clase e coa identidade.
Rosalía foi e é unha voz libre. E mentres a leamos, seguirá viva.