Os prestixiosos Premios Follas Novas do Libro Galego completan a súa derradeira fase de selección escollendo 4 títulos da Editorial Galaxia, entre os seus finalistas.
Estes galardóns, que valoran a produción literaria e editorial en Galicia durante o ano 2022, escolleron aos seus finalistas para esta octava edición que suman trinta e nove candidato/as entre títulos, iniciativas, proxectos e profesionais. As gañadoras dos premios Follas Novas 2023 daranse a coñecer na gala a celebrar o vindeiro 22 de abril no Teatro Principal de Compostela.
Na categoria de Ensaio e Investigación, destácase a obra gañadora do Premio Ramón Piñeiro de Ensaio 2021, Maternidades virtuosas. Unha crítica aos modelos profesionais de crianza, da autoría de María do Cebreiro. Unha proposta que estuda a idea da maternidade, condicionada por dous factores fundamentais: o decrecemento progresivo da natalidade e o atraso da idade á que as mulleres teñen o seu primeiro fillo.
Juana de Vega. A muller que desafiou o seu tempo, de Marilar Aleixandre e Emma Pedreira, son finalistas na categoría Divulgación. Nesta achega, as lectoras e lectores poden acceder a unha lectura fundamental para comprender a vida dunha muller completamente adiantada á época. Juana de Vega foi unha figura clave, que participou de forma activa na vida pública nuns tempos nos que isto non lles estaba permitido ás mulleres. Co seu tesón, conseguiu amosar que as batallas polas causas perdidas son semente de futuro.
Na categoría de Teatro, son finalistas As alumnas, de Paula Carballeira, obra que reflicte o que significou o franquismo para a educación en xeral, pero sobre todo para a das mulleres; e Estrela… fugaz?, de Carlos Labraña, ilustrado por Fon Barreiro, que xa fora gañadora do XVI Premio O Facho de Teatro Infantil 2015, libro que defende a diversidade e a importancia de ser nós mesmos.
O vindeiro 22 de abril celebrarase a gala na que se darán a coñecer as obras gañadoras nas 13 categorías dos premios nesta octava edición de 2023
