Dende hoxe estará dispoñible na nosa web, un blog de Ensinantes que pretende ser un punto de encontro e de comunicación cos profesionais do ensino.
Este novo blog quere ser unha nova ferramenta de cara a seguir profundando nesa idea de contacto estreito co muno do ensino que, dende a súa fundación hai sesenta anos, a Editorial Galaxia entendeu como unha das súas obrigas para levar adiante o proxecto cultural de recuperar Galicia e o galego para nós. Será, xa que logo, un espazo virtual para dialogar cos mestres e as mestras, cos profesores e coas profesoras, con toda a xente que dende as aulas traballa no ensino de Galicia co convencemento de que os cambios profundos fanse todos os días, tamén, dende os encerados, de xiz ou dixitais.
Neste electrónico espazo atoparemos, ademais de novas onde iremos vertendo a diario a actualidade da nosa actividade relacionada co ensino (novas fichas de lectura, publicación de textos para os lectores mozos e mozas…), suxestións de traballo relacionadas cos nosos libros, experiencias pedagóxicas, das moitas e de moita calidade que se fan no noso país…
En definitiva, neste blog de Ensinantes tentaremos abrir unha fiestra pola que pase o aire nas dúas direcións. Dende a editorial e os seus libros e dende as clases ata nós. Para entendernos e atendernos mutuamente.
Menu
Menu
