Álvarez, Ramiro J.
Ramiro J. Álvarez naceu ao pé da muralla de Lugo hai xa case medio século. De neno pensaba que debía estar ben iso de escribir libros, pero aconselláronlle que se deixase de parvadas e rematase dunha boa vez os deberes da escola. Daquela, decidiu apurarse ben para poder facer o que máis lle gustaba: ler, escribir contos, debuxar historietas e mirar mapas. Deste xeito, aplicouse aos seus estudios, pero sen perder de vista as moitas cousas que acontecían ao seu redor: a aparición da televisión, a chegada da coca-cola, os transistores e a primeira pegada do home na lúa. Case sen darse de conta, rematou os seus estudos de Maxisterio e logo os de Psicoloxía. Traballou como peón en Alemaña, de camareiro en Inglaterra, foi empregado de banca en Almería, mestre no Porriño e, agora, é orientador no IES nº1 de Sarria. De momento, segue coa sensación de que non fixo aínda os deberes todos, pero algún libriño que outro xa vai escribindo, que non hai mellor maneira de explicar leccións ou facer Psicoloxía que contar as cousas que a un se lle veñen á cabeza. Obras de Psicoloxía xa leva publicadas dez, pero esa é outra historia...