Un epistolario de Ramón Piñeiro
Menu
Menu
LETRAS GALEGAS 2023
Nesta breve homenaxe a Francisco Fernández del Riego, recóllese unha miúda selección, de entre a súa “oceánica” produción escrita, dalgúns fragmentos onde Compostela é a protagonista, directa ou como marco de acción, agrupados en catro apartados xenéricos: “A descuberta da cidade”, “A Compostela apostólica”, “O Santiago letrado” e “Semblanzas en Compostela”.
Santiago, Compostela, póla florida, inicio e remate de camiños que formaron e conformaron a personalidade dun home que loitou pola idea que tiña dunha terra e unha cultura como centro, a galega, e que se resume nunha frase súa: “Toda a miña vida lla dediquei a Galicia”.
Francisco Fernández del Riego, don Paco (Vilanova de Lourenzá, 1913- Vigo, 2010), dende os anos 30 desenvolveu un traballo constante e recoñecido a prol da cultura galega que fixo del unha das personalidades máis destacadas de Galicia. Foi un dos principais artífices da editorial Galaxia e director xunto a Ramón Piñeiro da revista Grial nos seus primeiros cen números. Ensaísta e narrador, é autor dunha extensa obra centrada sobre todo na cultura e na literatura galega.
Foi recoñecido con numerosos galardones como unha das principais figuras de Galicia (Premio Trasalba, Premio Pedrón de Ouro, Medalla de Ouro da Cidade de Vigo, Premio de creación cultural da Xunta de Galicia etc.). Foi nomeado Doutor honoris causa pola Universidade de Vigo e Galego Egregio pola Fundación dos Premios da Crítica. En 2023 a RAG dedícalle o Día das Letras Galegas.
