Flis-fli-ris-flás
Menu
Menu
Este libro fala desas cousas que, sendo moi importantes, non se poden mercar con cartos.
Fálanos de Area, que vai facer seis anos, e como calquera nena do seu tempo espera unha morea de agasallos, todo iso que anuncian pola tele. Quéreo! Necesítao!
Así e todo, seus pais pedíronlle a todos os amigos e amigas convidados á festa na casa (nada dun sitio deses de bolas) que non lle merquen nada.
É que seus pais a odian? Que é iso de que non lle merquen nada? De sabelo, non cumpre anos e queda con cinco para sempre…
Araceli Gonda, naceu en Morgadáns case case no día do libro de 1976. Estudou Xornalismo en Santiago, o que a levou á redacción de deportes da Televisión de Galicia. Alí leva once anos, a metade deles presentando distintos informativos. Tamén foi guionista en varias series de televisión, como 4º sen ascensor, Terra de Miranda ou Padre Casares. Con Flisflirisflás entrou no mundo da literatura infantil e atopou un mundo novo. Porque a través da obra de teatro da que naceu o libro, e tamén coa posterior A rebelión do monicreque -as dúas da compañía Matapiollos- descubriu o público máis esixente do mundo, pero tamén o máis agradecido. Así que… quen sabe? Isto pode se-lo comezo dunha gran amizade.
