O hospital das palabras

Categoría: Opinión

 

Nai e Pai sempre pensaran que a literatura era un microcosmos de emocións e silencios, un espazo acolledor para a pausa e a reflexión, un acubillo contra o acoso do ruído, un lugar de tránsito entre a certeza e os soños, unha gándara aberta onde as palabras adquiren o poder de transformaren a realidade.

Nai e Pai sempre souberan (e sentiran) que a literatura era, ante todo, un fogar sen paredes onde habitan o pracer e o coñecemento.

Pero de súpeto, un día, Fillo Pequeno púxose moi enfermo; Nai e Pai, asustados, acudiron axiña a un centro hospitalario; os médicos realizaron probas e análises e decidiron que aquel neno debía entrar urxentemente en quirófano; houbo logo complicacións cirúrxicas, noites insomnes de febre e antibióticos, xornadas angustiosas entre a esperanza e o medo; e durante un mes, hora tras hora, día tras día, Fillo Pequeno permaneceu deitado nunha cama, rodeado de cables e monitores, a recuperar moi devagar ese don tan fráxil que os humanos denominan saúde.

Durante un mes, Nai e Pai non se afastaron nunca de Fillo Pequeno; e el, desde a inmobilidade permanente do leito, cando por fin puido rogarlles cun fío escaso de voz, suplicou un único desexo: “Quero contos que non estean escritos”.E Nai e Pai, durante un mes, hora tras hora, día tras día, inventaron os contos que nunca antes souberan soñar. Contos para que Fillo Pequeno acougase do seu sufrimento: contos de raposos renartes e lobos covardes, de ratos viaxeiros e tartarugas voadoras, de leóns sen melena e xirafas con lentes, de dragóns sen lume e crocodilos con bágoas… e ata houbo un conto sobre o peido xigante que orixinou o universo: Big-Bang.
Finalmente, Fillo Pequeno curou. E Nai e Pai volveron sorrir.
Pero agora, na casa, cando celebran o fulgor alegre dos ollos do seu fillo, saben que a literatura é, antes que ningunha outra cousa, unha voz luminosa que sanda da dor.
E por iso nos hospitais, ademais de médicos, debería haber contadores de historias.
 
 

Comparte nas túas redes sociais ou por email