Esta data pon en valor os avances acadados a favor da infancia. O obxectivo desta celebración é a de lembrar á cidadanía que a cativada é o colectivo máis vulnerable, e, por conseguinte, aquel que sofre máis as crises e os problemas do mundo. Hoxe é un bo momento para chamar a atención e mirar ás nenas e nenos máis desfavorecidos, unha ocasión para subliñar os dereitos da infancia.
A través desta conmemoración lembramos que todos os nenos teñen dereito á saúde, á educación e á protección, independentemente da súa procedencia. Para celebrar esta efeméride, recomendamos a lectura de A pequena Kuna, de Mercedes Pacheco, ilustrado por Vanesa Álvarez.
Publicado na colección Libros para compartir, este álbum conta a historia de Lúa, unha protagonista feminina forte e moi curiosa. Situada na illa Mola-Mola, entre palmeiras, xoga a rapaza, de ollos grandes e escuros. A natureza é un elemento fundamental, xogando como acompañante, ao igual que as estrelas de mar, buguinas e cangrexos amigos.
Amigo do mar,
calma e serenidade.
Non todo é fatalidade
no teu universo de sal.
Amigo do mar,
alegría e felicidade.
Os alisios chegarán
as bágoas pasarán.
Amigo do mar,
a sorte vai cambiar.
Os alisios chegarán
o malo levarán.
Amigo do mar,
risas terás
de novo
no teu fogar.
Un bo día, a pequena Lúa coñece a Oli, o navegante dos oceános, e desde aquela, as súas vidas estarán unidas sucando mares e océanos co vento a favor.
Unha fermosa historia que subliña valores tan importantes como a amizade, o respecto á natureza e o diferente.
Mercedes Pacheco naceu en Vigo, rodeada de mar e gaivotas. Licenciada en Filoloxía Galego-Portuguesa, xogou coas palabras ata converterse en tradutora e correctora. Recibiu o Premio Lois Tobío 2005 pola tradución de Manhattan Transfer e publicou: Ben-Cho-Shey e a súa xeración (2018), Clara Campoamor y la lucha por el voto feminino (2020), Ao redor da xeración Nós. Catro ourensáns e un rianxeiro (2021) e Saboreando as palabras (2023).
