A colección Memoria Histórica de Editorial Galaxia suma un novo título coa investigación de Lupe Martínez, Guerrilleir@s antifranquistas da provincia da Coruña, con limiar de Antón Mascato.
Guerrilleir@s antifranquistas da provincia da Coruña, como afirma o autor do limiar, “é unha parte da historia dos homes e mulleres que fixeron que aquela idea de que en Galicia a sublevación dos militares franquistas foi un paseo sen resistencia, virase nunha falsidade perfectamente constatada, plena de argumentario intelixente, deixando que falen os documentos”.
É este un traballo rigoroso onde a autora achega un catálogo de combatentes antifranquistas que actuaron na provincia da Coruña, tamén con conexións noutras provincias. Recóllense biografías individualizadas e un amplo contexto onde situar o fenómeno das guerrillas naquel territorio, a máis activa e combativa, aínda que en todo o país tivo un papel importante tras o final da Guerra Civil e nos primeiros anos da ditadura.
Homes e mulleres senlleir@s, como Benigno Andrade García Foucellas, Manuel Ponte Pedreira, Adolfo Allegue Allegue Riqueche e Marcelino Rodríguez Fernández Marrofer, comparten protagonismo con outros e outras menos coñecidas, grazas a un salientable traballo de pescuda que nos achega a autora.
Unha lectura para non esquecer e facer un exercicio de memoria.
Lupe Martínez (A Coruña, 1979), é licenciada en Socioloxía e funcionaria de carreira na Administración autonómica.
Membro da Cátedra de Memoria Histórica da Universidade da Coruña e colaboradora de Nós Diario, publicou o libro Coa man armada. Ejército Guerrillero de Galicia – IV Agrupación (1946-1948) (2007), ademais de artigos sobre memoria histórica.
