Contoplanet supera as 7000 descargas

Categoría: Nova

A experiencia pioneira dentro do mundo editorial galego, Contoplanet, que permite a calquera persoa do mundo, a través da tenda App. Store mercar contos en galego, castelán e inglés do catálogo de Editorial Galaxia, superou xa as 7000 descargas.
Contoplanet, que xa foi merecente de varios premios EGANET e que foi incluso finalista dos Mestre Mateo do sector audiovisual, permite a descarga dos contos animados para lelos como se fosen un libro tradicional ou co seu audio en calquera dos tres idiomas. Ao tempo, permite a quen queira facer a súa propia gravación ou combinar as linguas para escoitar nunha e ler noutra.
Os títulos dispoñibles de Galaxia, á espera das novas incorporacións que se producirán en breve, son dous de Fina Casalderrey ('Puag!, que noxo!' e 'Un can no piso'), 'Quen son?', de Alicia Borrás, 'Voces na lagoa do espantallo', de Xan López Domínguez e 'Conto para non comer' de Oli.
A edición galega, e nomeadamente Editorial Galaxia apostan, con este produto editorial e outros como a edición para iPad de 'O soldadiño de chumbo' polos novos formatos dixitais para adaptarse aos novos hábitos de consumo cultural do século XXI.

Comparte nas túas redes sociais ou por email