O derradeiro trimestre do ano vai vir protagonizado por un mollo interesante de novidades literarias destinadas a todos os chanzos de idades.
Entre outras, presentaremos novidades de autores consagrados das nosas letras como Agustín Fernández Paz, Xabier López López ou Santiago Lopo.
'Zeralda e o dragón' é o título que Agustín Fernández Paz asina con Fran Jaraba, artista encargado de poñerlle imaxes a esta historia de princesas e dragóns que non porá en contacto co Agustín Fernández Paz máis fantasioso escribindo para o público infantil.
Na colección xuvenil, Xabier López López publicará, na colección Costa Oeste, 'Cando Artur non era rei'. Sabemos practicamente todo sobre o rei Artur, o mítico personaxe do que parecía que case que todo estaba contado. Nembargantes, faltaba por fabular todo o que houbo antes de que fose rei, e iso é o que nos conta esta novela destinada ao público xuvenil.
Finalmente, e na colección Literaria verá a luz o Premio García Barros deste ano, que recaeu en Santiago Lopo coa súa 'Hora Zulú', a confirmación do talento dun grande narrador que ten aínda moitas boas páxinas que nos regalar.
Haberá outras novidades interesantes das que iremos informando de vagar nos sucesivos días desta semana.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR