Víctor F. Freixanes, director xeral de Galaxia, é un dos editores invitados á mesa de debate inaugural da Feira Profesional do Libro de Buenos Aires, que se inaugurou onte na capital arxentina. É a primeira vez que un editor galego é invitado como tal a participar neste evento internacional, un dos grandes encontros de profesionais da edición en Latinoamérica.
A mesa de debate titulouse: "La experiencia de los protagonistas", dentro das palestras dedicadas a novas tendencias da industria editorial, con atención especial aos novos públicos, as novas técnicas de difusión cultural e as novas tecnoloxías da comunicación. Xunto co editor galego participaron no evento Karina Grasccarolli (Comunicarte, Arxentina), Pablo Braun (Eterna Cadencia, Arxentina) e Cristina Mosca (Bookshop, Uruguay), moderados polo profesor José del Río.
A Feira Profesional, cita anual de editores, distribuidores, técnicos e libreiros, precede á inauguración da Feira do Libro de Buenos Aires, que será inaugurada o día 19, promovida pola Fundación El Libro, que dirixe Gabriela Adamo. Durante tres días, os editores latinoamericanos (brasileiros, chilenos, uruguaios, colombianos, venezolanos, mexicanos e arxentinos) debatirán sobre as grandes tendencias que caracterizan a industria editorial nestes momentos, os novos horizontes da edición tecnolóxica nestes países, tanto en castelán como en portugués.
Editorial Galaxia vén traballando dende hai tres anos nunha Plataforma Dixital para a edición e a cultura galega (Galicia-Galaxia, GG), en colaboración co departamento de Novos Medios da Universidade de Santiago e coa participación tecnolóxica dos equipos da Universidade da Coruña, cun orzamento inicial de arredor de 200.000 euros, no que se pretende distribuir no mundo o produto cultural galego: libro, música, audiosivual, artes plásticas, turismo, gastronomía, nun deseño integrado e interdisciplinar. O prototipo, segundo os seu promotores, estará dispoñible a finais deste ano 2012.
"Para a cultura galega", explica Víctor F. Freixanes, "esta liña de investigación é fundamental: ou estamos presentes no novo horizonte tecnolóxico ou esmoreceremos. Os desafíos da nova modernidade pasan por un investimento decidido nestes novos modelos".

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR