O venres 17 de setembro, celebrarase, ás 21.00 h, no Auditorio Municipal de Ourense, a estrea da obra teatral Morgana en Esmelle, de Sarabela Teatro.

Baseada no libro de Begoña Caamaño, publicado na Editorial Galaxia, a edición e dirección corre a cargo de Ánxeles Cuña Bóveda.

Esta é unha novela que recibiu recoñecementos como o Premio da Crítica Española ao Mellor Libro de Narrativa 2012, Premio ao Mellor Libro de Ficción para a Asociación Galega de Editores 2012, Premio Antón Losada Diéguez 2012, ou o Premio da Asociación de Escritores e Escritoras en Lingua Galega ao Mellor Libro de Narrativa 2012.

A escritora conseguiu, neste texto, propoñer unha ollada diferente sobre o mundo artúrico e a Terra de Miranda; ofrecendo ao público lector unha novela que reescribe o mito cunha ollada contemporánea.

Morgana en Esmelle é unha reflexión en torno á responsabilidade de asumir as consecuencias non desexadas de cada un dos nosos actos. Un debate sobre a necesidade de adoptar compromisos incómodos e implicarse nos momentos históricos.

Sacrificada na loita entre dúas concepcións do mundo, Morgana interróganos sobre a lexitimidade das nosas razóns; mais, acaso a súa condición de vítima faina máis inocente?

Unha creación fundamental que, o venres, será estreada no mundo teatral. Un feito que honra o gran legado que deixou esta escritora en Galicia

Begoña Caamaño (Vigo, 1964-Santiago 2014) foi xornalista. Traballou nas seccións de cultura e sociedade dos informativos da Radio Galega, emisora na que exerceu dende 1989. Antes traballou nos servizos informativos de Radio Popular de Vigo e en Radio Noroeste. Foi correspondente en Vigo da Axencia Galega de Noticias e do desaparecido xornal madrileño El Sol. Colaborou en A Nosa Terra, Tempos e Novas da Galiza, e foi autora de reportaxes e artigos nas revistas Festa da Palabra, Silenciada e DeLiberadaMente.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR