Gonda, Araceli
Son Araceli Gonda, nacín en Morgadáns case case no día do libro de 1976. Fixen Xornalismo en Santiago, o que me levou á redacción de deportes da Televisión de Galicia. Alí levo once anos, a metade deles presentando distintos informativos. Tamén fun guionista en varias series de televisión, como 4º sen ascensor, Terra de Miranda ou Padre Casares. Con Flisflirisflás entro no mundo da literatura infantil e atopo un mundo novo. Porque a través da obra de teatro da que naceu o libro, e tamén coa posterior A rebelión do monicreque -as dúas da compañía Matapiollos- descubrín o público máis esixente do mundo, pero tamén o máis agradecido. Así que... quen sabe? Isto pode se-lo comezo dunha gran amizade.

Xosé Tomás,
Xosé Tomás ten desenvolvido a súa actividade maioritariamente no eido da ilustración e do humor gráfico. O seu debú monográfico en BD chegou coa obra Tolos, para a Universidade da Coruña. Colaborou no suplemento "Xatentendo.com" de "La Voz de Galicia" e traballa como debuxante nas edicións da Coruña e de Carballo deste xornal. Tamén fixo ilustracións e cómics para a revista "Plis-Plas" (Radio Galega / Xunta de Galicia). Participou habitualmente na primeira etapa de "Golfiño", realizando pasatempos e a serie "Luzbell". Conduciu diferentes obradoiros sobre BD e expuxo obra en mostras do Museo do Humor de Fene. Para a nosa editorial ten ilustrado libros como Flis-fli-ris-flás de Araceli Gonda ou Vou ter un irmán! de María Solar.