Dende o Himalaia a Ceilán
Menu
Menu
Escolma de lendas populares hindús, dirixidas aos lectores novos
A India é máis ca un país, é todo un mundo. A cultura hindú, formada ao longo de tres mil anos, é tan rica e multiforme que abrangue milleiros de deuses e deusas e unhas oitocentas linguas.
As lendas hindús que conta neste libro o narrador e poeta Darío Xohán Cabana son unha mostra desa marabillosa xuntanza de vellas crenzas e símbolos eternos. A historia do deus con cabeza de elefante, a do exército de simios de Rama ou a do Príncipe Siddhartha, o Buda por exelencia, han servir de porta de entrada a unha civilización sorprendente e fascinante.
Naceu en 1952 na aldea de Roás, no concello lugués de Cospeito e finou no mes de novembro de 2021. Era funcionario no Concello de Lugo, onde se dedicaba á xestión de asuntos culturais. Comezou a súa xa longa andaina literaria no ámbito da poesía, con libros como Romanceiro da Terra Chá (1973), Ábrelle a porta ó día (1981), A fraga amurallada (1983), ou Amor e tempo liso (1988), entre outros.
A narrativa é na actualidade a súa ocupación preferente. Neste xénero deu nos últimos anos varios títulos, entre os que figuran Galván en Saor (1989), Fortunato de Trasmundi (1990), As aventuras de Breogán Folgueira (1990), Vidas senlleiras (1992), O cervo na torre (1994), Morte de rei (1996) e Inés e a cadela sabia (2000). Tamén goza Cabana de merecida sona como tradutor polas súas versións galegas do Cancioneiro de Petrarca, A Divina Comedia e Vida nova de Dante.
En maio de 2006 publica con Galaxia o poemario Cabalgada na brétema.
