García Teijeiro, Antonio
Antonio García Teijeiro naceu en Vigo en 1952. É profesor, escritor e crítico de literatura infantil. Galardoado co Premio Merlín por Na fogueira dos versos, entrou na Lista de Honra do IBBY e concedéuselle o Premio Pier Paolo Vergerio da Universidade de Padua (Italia), un dos máis prestixiosos de Europa. Co poemario Arredor do teu corpo gañou o Premio Illas Sisargas. Pero estes son só algúns dos moitos recoñecementos que atesoura. Algúns dos seus poemas foron musicados por grupos de Galicia e por músicos como Antón Seoane e Paco Ibáñez. Mantén unha intensa actividade na rede dende o blog Versos e aloumiños. Foi premio nacional de literatura infantil e xuvenil en 2017.

López Domínguez, Xan
Un dos ilustradores galegos de literatura infantil con maior proxección internacional. Iniciou a súa carreira na BD coa súa participación no fanzine "Xofre" en 1979. Tres anos despois participa na exposición "Coordenadas" e no número especial que a revista do mesmo nome dedicou á banda deseñada e participa en "El patito feo". Colaborou con "Can sen dono", "Cine e historieta galega", "A banda do 17" e máis recentemente, "BD Banda" e "Golfiño". A súa carreira orientouse cara a ilustración para libros infantís e xuvenís, eido no que alcanzou recoñecemento internacional. En 1979 gañou o segundo premio no certame de banda deseñada que organizou a asociación "O facho". Ao longo da súa carreira recibiu numerosos galardóns: Premio Rañolas de Ilustración, Curuxa do Humor do Museo de Fene, Lista de Honra do IBBY en Berlín, Ilustrador do ano 1994 en Boloña, Placa da Bienal de Bratislava, Premio Malba Tahon da Federação Brasileira do Livro Infantil e Juvenil (IBBY), Lista de White Ravens da Biblioteca Internacional da Xuventude de Munich. Ademais, Voces na Lagoa do Espantallo foi considerado entre os cen mellores libros do século XX pola Fundación Germán Sánchez Rupérez.