Hoxe martes, día 15 de decembro, preséntase en Compostela a última novela de Xosé Neira Vilas, Romaría de Historias, cuxo lanzamento preparaba con ilusión o autor de Gres antes do seu pasamento. Mantense a cita que el mesmo fixara, o día 15 ás 20h na Libraría Pedreira, cun acto de recordo no que participarán o crítico literario Armando Requeixo e o director xeral de Galaxia, Victor F. Freixanes.

Romaría de historias é unha novela feita de retrincos; non se trata dunha vida, senón de moitas vidas, non relata unha historia, senón un mangado de historias que acaban por dar forma a un mundo. Con habelencia de contador de historias, coma aqueles sabios que transmitían a cultura oral dunha xeración a outra, Neira Vilas consegue tecer un patchwork no que un conxunto de pezas autónomas acaba por confeccionar a imaxe colectiva do mundo das aldeas galegas. Un mundo que para os lectores de hoxe xa parece descoñecido, cando menos parcialmente; así, o autor de Romaría de historias pon a súa novela baixo a advocación dunha cita de John Berger: "A maior catrástrofe cultural do século XX foi a perda da cultura campesiña. Ese mundo está a punto de desaparecer".

Nesta novela latexan, rebolen, agurgullan personaxes e aconteceres das aldeas gale- gas ao longo de moitos anos. Son as aldeas e as xentes de onte e de hoxe que volven á actualidade da man dun dos narradores que mellor sabe rexistrar e transmitir as pegadas ás veces intanxibles dun mundo que, como afirma John Berger, está a piques de desaparecer. Na obra de Neira Vilas ese mundo case extinto vira vizoso, revive, aparece con azos novos perante quen le.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR