Presentación de “A historia de Sara”, no Carballiño

Categoría: Nova

O martes 18 de abril, celebrarase, ás 20:30 h, na tenda OZOCOgz deseño galego, no Carballiño, a presentación de A historia de Sara, de Francisco Castro, ilustrado por Luz Beloso.

Acompañando o autor e a ilustradora, estará o escritor Miguel Anxo Fernández.

A historia dunha nena de 6 anos, contada por ela mesma, sobre un asunto atroz. 

A historia de Sara, de Francisco Castro, ilustrado por Luz Beloso, é un libro singular de difícil definición.

A historia está contada por unha cativa de 6 anos, na linguaxe dunha nena tan pequena, nun uso da linguaxe como o dunha nena pequena… pero do que nos fala é dun tema duro, difícil, algo que unha nena de 6 anos non debería ter que vivir.

A través dunha trama apaixonante, só descubriremos ao final do libro, que é o que atenaza á pequena. A historia de Sara ocúpase dun tema complexo que ten que ver con algo que a infancia nunca debería padecer. Unha ollada dende a infancia á brutalidade dos adultos, ao inferno no que, en moitas ocasións, son as casas cando deberían ser un remanso de paz.

Sara leva calada moitos anos. Sara non fala. Porque garda un segredo. Temos que ler o libro para entender que é o que a está a destruír por dentro…

A historia de Sara non é un libro infantil, malia que a cativada poida lelo. É un libro que nos interpela aos adultos, que nos interroga sobre como é posible que sucedan certas cousas terribles no seo dos fogares.

Francisco Castro (Teis-Vigo, 1966) leva moitos anos publicando libros nos que aborda temáticas difíciles, para toda clase de públicos. Ten escrito sobre o alzhéimer, o dano cerebral adquirido ou a prostitución infantil. Coida que se pode falar de todo dende a literatura sempre e cando o fagamos coa linguaxe axeitada. O traballo artístico de Luz  Beloso axuda a convertir este libro nun proxecto global onde palabra e cor se unen para contar unha historia que nunca debería suceder.

Comparte nas túas redes sociais ou por email