Parladoiro das Letras, con Francisco Castro, no Teatro Principal da Estrada

Categoría: Nova

O escritor Francisco Castro protagonizará mañá o último Parladoiro das Letras do Teatro Principal, do Concello da Estrada.
O Teatro Principal da Estrada acollerá mañá ás 20.30 horas o último Parladoiro das Letras da tempada co gallo do seu 75 aniversario, protagonizado polo escritor vigués e director da Editorial Galaxia, Francisco Castro. 
A tertulia literaria xirará arredor da obra do autor, gañador do Premio de Novela Manuel García Barros no ano 2007. Ademais, analizará o estado do mundo editorial e desvelará curiosidades sobre o escritor. A entrada para o evento será de balde ata completar as 40 prazas dispoñibles. 
O moderador do Parladoiro será o locutor de Radio Estrada Pablo Chichas, e os asistentes poderán formularlle as súas preguntas ao protagonista. 
Francisco Castro (Vigo, 1966) director xeral da Editorial Galaxia. En 2010 foi elixido presidente da Asociación Galega do Libro Infantil e Xuvenil (Gálix). É un dos narradores galegos que comezaron a publicar no inicio do século XXI. A súa narrativa destaca pola orixinalidade á hora de abordar xéneros moi diferentes. É autor do libro de relatos eróticos Xeografías, de A canción do náufrago, ambos de 2001, e do relato histórico Memorial do infortunio. En 2004 publicou Xeración perdida, novela coa que adentra ao lector no mundo das drogas, e Un bosque cheo de faias, que gañou o Premio Frei Martín Sarmiento. Recibiu en 2006 o Premio Blanco Amor de novela longa con Spam que publica Galaxia. En 2007 resultou gañador do Premio de Novela Manuel García Barros, concedido polo Concello da Estrada, coa novela As palabras da néboa, publicado por Editorial Galaxia. No mesmo ano publica ‘O ceo dos afogados’ que foi finalista do premio Fundación Caixa Galicia e que recibiría o Frei Martín Sarmiento como mellor libro do ano. En 2009 obtivo o Primeiro Accésit e Pluma de Prata no I Certame de Xornalismo de Opinión Raimundo García ‘Borobó’ polo seu artigo titulado ‘Borobó despedido’. No eido da narrativa infantil e xuvenil é autor de ‘Chamádeme Simbad’ (2009), Premio Frei Martín Sarmiento e lista de Honra do IBBY, e ‘O segredo de Marco Polo’ (2010). En 2013 resultou gañador do Premio de Novela por Entregas de La Voz de Galicia pola súa obra ‘O corazón da Branca de Neve’ e, en 2014, publicou a novela xuvenil ‘Tes ata as 10’, obra que recibiría o Premio Frei Martín Sarmiento en 2016. En 2018 entrou a formar parte da sección de Pensamento do Consello da Cultura Galega. No ano 2022 publicou o seu primeiro ensaio titulado Isto SI é un home.
 

Comparte nas túas redes sociais ou por email