Galaxia reedita “A nosa cinza” e a inclúe na colección Biblioteca Xavier Alcalá

Categoría: Nova

A nosa cinzaunha das obras máis populares da narrativa galega, é reeditada por Editorial Galaxia e publicada na Biblioteca Xavier Alcalá. Esta é a segunda biblioteca creada, despois da de Xosé Neira Vilas, dun autor vivo.

A capital do mundo, foi a encargada de inaugurar esta nova colección, que vai ilustrada con obras do pintor Paul Klee.

Xavier Alcalá relembra o mundo da infancia a través do seu protagonista, un rapaz que medra durante os anos da posguerra. Os días da escola, a adolescencia, coas súas inseguridades e medos, o espertar dos sentimentos amorosos e a descuberta do valor da amizade cóntanolos o autor coa frescura e autenticidade do vivido. A experiencia cotiá feita literatura.

Xavier Alcalá (Miguelturra, Cidade Real, 1947) é enxeñeiro de telecomunicacións, ademais de colaborar na prensa, actualmente cunha columna en La Voz de Galicia. Instalado en Galicia desde a nenez, iniciou a súa obra literaria con Voltar, seis personaxes e un fado (1972), obra á que ían seguir títulos como A nosa cinza (1980), Fábula (1980), Nos pagos de Huinca Loo (1982), Cárcere verde (1990), Latitude austral (1991), Código morse (1996) e Alén da desventura, novela coa que obtería o Premio Blanco Amor no ano 1998. Tamén é autor da triloxía “Evanxélica memoria”, en que se relata a epopea das comunidades evanxélicas en Galicia, constituída polas novelas Entre fronteiras (2004), Nas catacumbas (2005) e Unha falsa luz (2007). En 2012, publicou a novela Verde oliva, sobre a revolución castrista en Cuba, e The Making of (2018), o retrato dun sobrevivente, onde se descobre a aventura oculta da emigración galega na Arxentina.

Comparte nas túas redes sociais ou por email