Despois dun verán ateigado de lecer e boas lecturas, a Editorial Galaxia abre de novo as súas portas ao público ofrecendo todo tipo de opcións literarias.
Celebrando as súas vodas de ouro coa poesía, a escritora Helena Villar Janeiro festexa o seu amor pola palabra co libro De rosa antiga. Unha escolma que recolle a súa obra dende 1972 ata 2022. Velaquí unha mostra significativa do que leva dado de si un talento que se iniciou hai cincuenta anos.
Os amantes da escrita de María do Cebreiro están de sorte porque este mes agardamos a chegada do seu novo libro Maternidades virtuosas. Unha crítica aos modelos tradicionais de crianza, Premio Ramón Piñeiro de Ensaio 2021. Nel a autora estuda a idea da maternidade, condicionada por dous factores fundamentais: o decrecemento progresivo da natalidade e o atraso da idade á que as mulleres teñen o seu primeiro fillo.
Explorar os novos dispositivos parentais, e as súas implicacións colectivas, é o principal obxectivo deste ensaio, que entra en diálogo con clásicos da literatura feminista, ao tempo que tenta explorar os límites da dimensión confesional do xénero.
Marcos Lorenzo é o encargado de inaugurar a nova colección Heterodoxos conEnser. Un libro breve e xeneroso, escrito con brillantez e cunha atención característica que atende tanto á rítmica do texto como á música da fala.
Hai nel un humor sobrio e un emprego coidadoso da temperatura emocional, e a súa amabilidade é compatible cunha dureza que, máis que un trazo argumental, é unha virtude estilística.
