Esta fin de semana, preludio da vindeira en que os escolares collerán xa as vacacións de Nadal, vai ser especialmente prolífico en concertos pensados para eles. Os músicos e músicas que recentemente teñen publicado libro-discos na nosa editorial, visitan distintas localidades para seguir cantando, desta volta en directo, as cancións que xa se poden debullar nos libros-cds que publicamos.
Así, o espectáculo protagonizado por Uxía, 'Cantaruxa coa Bruxa Maruxa', chega ás terras de Teo. Será o venres 13, ás 12'30 no Auditorio da Ramallosa.
O espectáculo argállase arredor dos temas de 'María Fumaça', un dos grandes éxitos musicais do ano pasado. Poucos nenos e nenas de Galicia quedaron sen cantar e bailar con esta locomotora festeira. Agora, para seguir gozando, creamos un concerto en pequeno formato protagonizado pola Bruxa Maruxa (Uxía) e o seu axudante (o músico ‘brasilego’ Sergio Tannus) coa idea de visitar os colexios e os concellos que queiran acollelos. Está garantida a diversión, ledicia musical por un tubo e a poesía. Todo enmarcado nun canto feliz á diversidade.
O mesmo venres, pero na Coruña, Pablo Díaz estará na FNAC ás 18 horas ofrecendo un pequeno concerto de presentación centrado no seu novo traballo, o libro-disco TOC TOC. Logo do éxito do seu Tic Tac, hai xa catro anos, Pablo Díaz continúa a súa carreira na música para os máis novos co lanzamento de Toc Toc, un libro-disco, que conta con ilustracións de Nuria Díaz e que achega un feixe de temas optimistas e con ritmo. Canda ao que dá título ao volume, tamén hai cancións dedicadas ao Apalpador, á defensa do medio ou ao coidado dos animais, todo elo con ritmos alegres e grandes doses de fantasía. Díaz conta cunha banda de apoio e inclúe no traballo instrumentos como gaita, guitarras, acordeón e percusións.
Finalmente, o sábado, en Vigo, na Casa do Libro, Mamá Cabra ofrecerá un pequeno concerto acústico centrado nos temas do seu novo traballo, asinado con Susa Herrera, 'Cartas que veñen e van'. Será ás 18 horas nun pequeno e intenso formato que no pasado Culturgal arrasou en afluencia dun público entregado que gozou da festa, coma sempre acontece cos traballos deste popular grupo de música infantil.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR