Fin de semana con 'O señor das Dunas'

Co cambio de ano reinicia a súa actividade FalaRedes, o programa de dinamización da Secretaría Xeral de Política Lingüística para a Rede de Dinamización Lingüística na que colabora, entre outras empresas culturais, a Editorial Galaxia. FalaRedes lévase adiante en máis de 90 entidades locais e consta dun mollo de actividades diferentes. Entre outras, ‘O señor das dunas’ que produce Merlín Comunicación (do Grupo Editorial Galaxia) e Adarme Visual, un espectáculo dirixido a todos os públicos, dende os nenos e as súas familias ata os máis vellos da casa. Baseado na literatura oral galega, trátase dun espectáculo de contacontos que se complementa coa ilustración en directo do relato feita con area. Os asistentes recibirán como agasallo un libriño cos contos que escoitaron.
Nesta fin de semana o espectáculo visitará o día 12 o concello de Vedra (no Centro da Terceira Idade ás 16:00 h) e o de Taboado, ao día seguinte (na Casa da Cultura do Antigo Cuartel ás 18.00 h.)