Hoxe celebramos o Día da Educación Ambiental, unha data que nos lembra a importancia de coidar e preservar o máis importante que temos: a natureza. Xenerosa e sabia, é a encargada de brindar a todas e todos os recursos necesarios para sobrevivir e desfrutar do mundo. Como especie humana, temos unha débeda con ela, o planeta está sufrindo e, entre todas as persoas, é a nosa responsabilidade coidalo e procurar que este teña un futuro mellor.

O cambio climático, a deforestación, a contaminación dos océanos… son realidades que parten dun mesmo punto: a irresponsabilidade persoal e empresarial de todos aqueles que deciden mirar cara a outro lado, en lugar de buscar alternativas de consumo, enfocadas á sostibilidade.

A educación é a arma máis poderosa que temos para cambiar isto, polo que é fundamental que as nenas e nenos tomen conciencia dende as primeiras idades do gran reto que afrontamos. É esencial que a cidadanía atope un camiño cara a unha realidade sostíbel. Educar á cativada neste tipo de valores é fundamental para que os líderes do futuro poidan atopar solucións e crear novas formas de xerar un mundo mellor.

A autora e contacontos Paula Carballeira, cómplice nesta loita, pon o seu grao de area escribindo en prol dunha sociedade máis concienciada. Proba disto é o seu libro, publicado na colección Árbore de Editorial Galaxia, Carabela. Pensado para unha lectura a partir de 9 anos, esta obra de teatro, seleccionada pola prestixiosa lista OEPLI no ano 2020, amosa a importancia de preservar o medio ambiente.

Ilustrado por Abi Castillo, conta a historia de Carabela, a cociñeira dun barco que naufraga na Illa Pequena de Plástico, onde está soa e rodeada de peixes mutantes que a advirten que son tóxicos, de paxaros que tamén se queixan por comer substancias nocivas… Para aliviar a tristeza, Carabela constrúe unha nena de Plástico á que lle conta historias de como é o mundo fóra da Illa Pequena.

Coidemos, todas as persoas, o noso mundo, único e perfecto; loitemos por un futuro sen plásticos.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR