O venres 28 de xaneiro, celebrarase, ás 20:30 h, na Sala Arcos Moles do Auditorio de Rianxo, a presentación de Baixo as alas de abril, de Xoaquín Fernández Leiceaga, organizada pola A. C. Barbantia.

Acompañando o autor, estarán o alcalde de Rianxo, Adolfo Muiños;  Xesús Laiño e María Xesús Blanco, en representación de A. C. Barbantia.

O acto contará coa intervención artística a cargo do gravador e pintor Pepe Míguez.

Como o aforo é limitado, recoméndase reservar praza a través da seguinte ligazón:

www.concelloderianxo.gal/reserva 

Esta é unha novela de intriga policial coa que Fernández Leiceaga indaga nas raíces da sociedade actual. Amor, violencia, nación. As ilusións perdidas acaban por dar forma á realidade.

O libro sitúa ás lectoras e lectores en febreiro de 1989, momento no que, tras un atentado contra un cuartel da Garda Civil, o comisario Miguel Santos, coñecido por afastarse dos métodos empregados pola anterior policía franquista, ocúpase da investigación. A detención do grupo independentista autor do feito é obxectivo prioritario do goberno español. Ás implicacións políticas para a democracia axiña se han engadir as consecuencias na vida dos militantes do grupo armado e dos seus achegados. Mariló rexenta o bar familiar e ten o seu irmán agonizando no hospital, onde unha visita do comisario Santos, que acaba de ser pai, vai desdebuxar os límites do convencionalmente esperable.

Un libro imprescindible para pensar o presente e o futuro.

Xoaquín Fernández Leiceaga (Noia, 1961) é autor da novela Agosto de memoria e morte (2015). En 2020, publicou o ensaio O país do porvir (Editorial Galaxia)

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR