A Editorial Galaxia publicará no mes de maio un libro de BD que adapta catro relatos curtos de Castelao que aparecen nas obras Retrincos e Cousas. Durante este 2017, Galaxia publicará 3 Novelas Gráficas nunha aposta clara por este novo formato editorial.

Sempre se dixo que se Castelao vivise actualmente faría banda deseñada ou animación e esta idea de fondo é a que impulsa este proxecto que, da man de Kiko da Silva (Premio Castelao de BD en 2014) e do seu equipo, formado por alumnado do Garaxe Hermético, chegará ás librerías en maio.

A adaptación quere crear unha historia longa a partir deses catro relatos curtos, pois todos eles beben de temas comúns e así as historias vanse fiando e poden lerse como unha soa. O resultado será unha novela gráfica a toda cor en capa dura que estará acopañada por material didáctico do proceso de creación da bd. Un material que despois tamén se converterá nunha exposición.

A idea é mostrar un Castelao máis duro, máis adulto, máis poético. Amosar a Galicia da época dunha maneira universal, porque o noso patrimonio cultural debe espallarse e coñecerse máis alá das fronteiras administrativas.

Kiko da Silva afronta este proxecro coa intención de conseguir renovar a visión tanto plástica como de percepción narrativa do rico mundo literario creado por Castelao. Uns relatos moi visuais e novidosos para a súa época, que amosaban unha poética propia e cercana á narrativa fragmentada que se utiliza na actualidade para crear as historias de banda deseñada. Ademáis quería demostrar que cambiando os métodos de traballo, pódese producir bd de calidade en tempos máis competitivos para a realidade do noso mercado.

Así pois, as páxinas estarán debuxadas por Kiko da Silva, autor da adaptación ao guión, e un grupo de alumnos do Garaxe Hermético, a escola profesional de banda deseñada que creou o propio Da Silva en Pontevedra en 2012. Todos traballarán por outorgarlle unha nova poética visual a Castelao.

Debuxo e guión : Kiko da Silva

Documentación: Zaida Novoa, Manuel Tudela, Pablo Prado

Story board: Julián Landriz, Alberto Cardona e Kiko da Silva

Escaneado e limpeza de orixinais: Manuel Tudela

Flats de Cor: Zaida Novoa, Pablo Prado

Separación de capas luces e sombras: Pablo Prado

Rotulación: Manuel Tudela

Cor definitva e texturización: Kiko da Silva

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR