A nosa fábrica de libros pechará as súas portas durante todo o mes de agosto, a partir do día 1. O equipo galáctico estará de vacacións ata setembro, coa vista e co corazón nas novidades que chegarán para o novo curso, e tamén en todos os títulos que fornecen o noso catálogo.
Neste primeiro trimestre, encargado de inaugurar o ano do noso 75 aniversario, as publicacións encargadas de dar o disparo de saída estarán enfocadas a todos os públicos, dende libros de literaria, infantil, premios… son moitas as obras escollidas para o noso público.
Velaquí un chisco máis de información para ir abrindo boca:
SUCOS, Premio Simbad para o Recordo e o Alzhéimer 2023, de Ignacio Vidal Portabales, ilustrado por Sandra Lodi. Publicado na colección Árbore, recomendado para lectura a partir de 8 anos, este libro conta a historia de Aldara e o seu avó. O vello Moncho, comeza a facer cousas raras e, a súa neta, preocupada por el, vaino acompañar nunha extraordinaria aventura enriba dunha padeadora amarela, coa que percorrerán camiños e leiras.
OS INIMIGOS IMAXINADOS, de Xosé M. Núñez Seixas. Publicado na colección Ensaio, este libro aborda a historia sociocultural da colectividade galega na Arxentina, a máis importante de América, entre finais do século XVIII e mediados do XX, e analiza a conformación da súa identidade colectiva en relación coas imaxes que sobre os inmigrantes circulaban naquela sociedade. Un rico calidoscopio de imaxes, estereotipos e contraimaxes que neste libro se reconstrúe para contribuír ao coñecemento das mentalidades e imaxinarios da diáspora, parte indispensábel da historia da Galicia contemporánea.
E vós, que leredes durante este verán?
Vémonos á volta, cargadas de novidades! Felices vacacións e boas lecturas!
