Escoller onde buscar

Tempo de despedida

Categoría: Opinión

Pouco escoitei falar nesta campaña electoral de cultura, se cadra porque iso non dá tantos votos como falar de coches… Pero quero ver nese feito constatable unha fenda de esperanza, e crer que a nosa cultura pode suscitar máis consensos que liortas, máis entusiasmo que escepticismo, e que non vai ser utilizada para o axuste de contas sectario.
Quero crer que o novo equipo encargado de xestionar a política cultural galega vai aproveitar o traballo feito nesta lexislatura que agora fechamos (cunha certa saudade), que non vai desmantelar tantas estructuras creadas, tantas redes tecidas e que saberá aproveitar o pulo que dende a Consellería e a Dirección Xeral se lle deu á nosa música, á danza, á literatura… aínda que quedase tanto por facer.
E digo isto porque teño a impresión de que o labor serio, constante e a miúdo pouco visible do equipo saínte ficou escurecido pola inexplicada defenestración dunha Conselleira a que sempre se lle relearon apoios, malia ser quen de coller o touro da Cidade da Cultura polos cornos, e de liderar un dos proxectos máis coherentes da lexislatura. E penso eu que, na desfeita, cómpre reparar en que non todo é entullo.

Comparte nas túas redes sociais ou por email