O mércores 16 de novembro, celebrarase, ás 12:15 h, en El Castro de Vigo, unha rolda de prensa arredor dos títulos que publicamos na Editorial Galaxia con motivo do 20 aniversario da catástrofe Prestige: “Prestige. 20 anos x 20 voces”, “Tal como foi, tal como fomos”, de Xosé Manuel Pereiro, e “Cando choraron as Cíes”, de Santi Domínguez.

Acompañando os autores Santi Domínguez, Inma López Silva, e Raquel Castro, estarán Roi Cuba Dorado, presidente de ADEGA, e Francisco Castro, director xeral de Editorial Galaxia.

Cúmprense 20 anos da catástrofe do Prestige e a editorial Galaxia quere sumarse a ese aniversario e contribuír a construción do relato colectivo daquel desastre ecolóxico  que marcou un antes e un despois na nosa sociedade e que permanece aínda marcado a ferro na memoria de todas e todos.

Esta contribución editorial materializase na publicación de tres libros que dende distintas perspectivas, xornalística, política, persoal, literaria e visual, pretenden poñer luz e facer memoria daquelas xornadas do ano 2002.

O xornalista Xosé Manuel Pereiro en Tal como foi, tal como fomos, un libro que el non quere cualificar nin como investigación nin como ensaio, procura na verdade do que pasou naquel naufraxio e posterior marea negra, Nunhas páxinas escritas co brío a paixón  do correspondente de guerra, relata  o desastre tal como foi, e nos retrata a nós tal como fomos naqueles días en que segundo el sufrimos un trastorno mental  transitorio en que a solidariedade, o compromiso e o altruísmo estendeuse como un andazo por todos os recunchos do noso país.

No libro colectivo Prestige, 20 anos 20 vocesvinte escritoras e escritores  galegos, encabezadas pola recente premio nacional de narrativa Marilar Aleixandre, lembran coas súas  propias palabras aqueles días incertos e aciagos. Vinte voces que berran todas a unha como aquel  afastado 20 de novembro de 2002. E con elas, os rostros, os acenos e as mans dos que estiveron en primeira liña, os retratos dos  voluntarios protagonistas obra do fotografo Jose Luis Abalo, daqueles  que loitaron heroicamente contra aquela marea de chapapote  que quixo devorarnos mais non o logrou. Ademais os autores e autoras cederon os beneficios deste libro en favor da asociación ecoloxista ADEGA que dende 1976 traballa en defensa do medio ambiente galego e global do que depende a nosa calidade de vida

O daquela concelleiro vigués, Santi Domínguez, narra a xeito de diario persoal  en Cando choraron as Cíes, aquel día en que  chorou o mar e milleiros de persoas se converteron en panos de mans para enxugar as súas bágoas e  foron quen de berrar Nunca Máis. Un libro que trata de amor, dese amor que moitos e moitas lle demostraron ao mar cando estaba estragado pola negrura e a escuridade.  Un libro que contén os testemuños de homes e mulleres que, coas súas mans e o seu alento, foron capaces de defender o noso.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR