12 MULLERES SEN ROSTRO
Raíñas, nobres, bandoleiras, heroínas en batallas e revolucionarias; mulleres con vidas que se mesturan coas lendas e personaxes de lenda que puideron existir na realidade. Mulleres que sufriron as consecuencias de ser muller e con historias reflexo de moitas outras que foron esquecidas. 12 mulleres sen rostro….Rosa de Cabanas imaxina estes rostros, para achegarnos non só unha cara, senón tamén unha historia.
Cabanas (Ouzande, A Estrada, 1976). Compaxina a súa actividade como arquitecta con traballos de deseño gráfico e ilustración en diferentes ámbitos.
Nos últimos anos desenvolveu varios proxectos artísticos propios como Mulleres valentes, Mulleres imaxinadas, Compañeiras, O mundo na cabeza e As que fan a festa, onde explora temas sempre presentes na súa obra: a muller, a identidade galega e rural e a memoria.
En 2025 participou como ilustradora na obra Os seráns de Vilancosta, de Santiago Cortegoso, publicada por Editorial Galaxia.
