Este xoves, Emilio Pérez Touriño presentará o seu novo libro CRISE GLOBAL E CRISE DA POLÍTICA. UNHA OLLADA DENDE GALICIA. No acto intervirán, ademáis do autor, o tamén expresidente da Xunta, Fernando González Laxe e o director xeral de Galaxia, Victor F. Freixanes.

O LIBRO: Logo da publicación de O futuro é posible en 2012, Emilio Pérez Touriño volve tirar do prelo outra obra, desta volta relacionada coa actualidade: Crise global e crise da política. O expresidente da Xunta de Galicia debulla neste libro unha ollada á crise que nonse limita a análise senón que formula unha proposta dende Galicia.

Efectivamente, tal como o describe no limiar o xornalista Fernando Salgado: "Emilio Pérez Touriño proponnos neste ensaio múltiple, composto por artigos publicados na prensa e textos ata agora inéditos, unha lúcida reflexión sobre o […] dramático día despois. […] Un cambio de época que anuncia un novo paradigma socioeconómico, probablemente con novos actores e distintas políticas, malia a teima das forzas hexemónicas en restaurar o vello modelo neoliberal que foi precisamente o que rebentou, con estrépito, a partir do afundimento de Lehman Brothers".
A reflexión de Pérez Touriño realízase dende unha perspectiva galega e co propósito de promover o debate que precede á acción transformadora. Trátase, por unha banda, da visión analítica dun economista perspicaz que repensa en clave inconfundiblemente galega a xénese, desenvolvemento e impacto da crise económica. Pola outra, pon encol da mesa a proposta dun político experimentado que demostra que é posible devolverlle a ilusión a Galicia. Como apunta Salgado no prólogo, "Velaí a orixinalidade, e confiemos en que a eficacia, desta obra".

O AUTOR: Emilio Pérez Touriño (A Coruña, 1948) é doutor en Ciencias Económicas e profesor numerario na USC. Autor de numerosos traballos, entre os que destaca Economía campesiña e capital: a evolución da agricultura galega (1960-1980), foi Premio Nacional de publicacións agrarias en 1982 co estudo Análisis de la pequeña producción campesina. Máis recentemente, publicou A Galicia emprendedora e En clave de país e, no 2012, dirixiu El espacio eurorregional Galicia-Norte de Portugal. Crisis y perspectivas.

Comprometido cos movementos democráticos de loita polas liberdades, participou directamente no proceso do Estatuto de Autonomía de Galicia e nos Pactos do Hostal. Subsecretario do Ministerio de Transportes e secretario xeral de Infraestruturas entre 1985 e 1994, foi secretario xeral do PSdeG de 1998 a 2009, e presidente da Xunta de Galicia durante o período 2005-2009.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR