O luns 7 de xuño, celebrarase, ás 17 h, na Sala Biodiversidade do Museo de Historia Natural de Santiago de Compostela, a presentación do libro Tiven a chave, a bicicleta e os catro libros, pertencente á colección Feminismos de Editorial Galaxia, de Xoana Pintos.

Acompañando a autora, asistirán María Jesús Lorenzana Somoza, conselleira de Emprego e Igualdade, Vicente Pérez Muñuzuri, vicereitor de Investigación e Innovación da USC, e Francisco Castro, director xeral de Editorial Galaxia.

O acto retransmitirase en ‘streaming’ a través da seguinte ligazón:

https://www.youtube.com/watch?v=3z5lWkoGxhA

Xoana Pintos achega unha ollada ó labor das primeiras científicas na Universidade de Santiago de Compostela, pioneiras que loitaron, con moito esforzo, pola igualdade de dereitos. O resultado do seu traballo é a nosa realidade actual. Sería impensable cuestionar o dereito das mulleres á educación, a ter unha carreira universitaria… pero o certo é que non sempre foi así. Houbo que loitar moito contra a discriminación xa que, polo simple feito de nacer muller, a vida xa estaba limitada e dirixida a moi poucas opcións posibles. Xoana Pintos, recorre, en Tiven a chave, a bicicleta e os catro libros, ese camiño que amosa a entrada das mulleres na universidade, un feito que cambiou a vida de todas as que viñeron detrás.

A autora céntrase no eido das mulleres científicas, no seu traballo cheo de dificultades, e, porén, de éxitos innegables, froito da súa valentía férrea.

Xoana Pintos. Compostelá, é doutora en Bioloxía pola Universidade de Santiago de Compostela, con especialidade en Bioloxía Mariña. Realizou estudos avanzados de Microbioloxía e Historia da Ciencia. Persoa de variados intereses, céntrase na actualidade no estudo das achegas das mulleres á ciencia, a súa loita pola educación e o papel das científicas na investigación. É autora de múltiples publicacións, coas que pretende visibilizar e divulgar o traballo e contribucións das investigadoras e fomentar vocacións entre as estudantes máis novas.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR