Hoxe tivemos a honra de recibir nas instalacións de Editorial Galaxia, en Vigo, a visita dun grupo de estudantes e profesoras do Instituto arxentino-galego Santiago Apóstolo de Bos Aires. Mozos e mozas chegados dende a outra beira do Atlántico achegáronse á nosa sede para fortalecer os lazos cos valores herdados dos seus devanceiros, que seguen vivos no seu día a día en terras porteñas.
O director de Edicións, Marcos Calveiro, xunto co equipo da editorial, foi o encargado de darlles a benvida. Durante o encontro compartimos con eles a historia de Galaxia, a realidade cultural actual e como funciona o sector editorial dende principio a fin.
A visita tamén permitiu afondar na ascendencia galega da maioría do alumnado e comprobar o seu notable coñecemento da lingua e das figuras máis destacadas da nosa cultura. Foi unha oportunidade para tecer pontes entre a ría de Vigo e o Río da Prata.
Instituto Santiago Apóstolo
O Instituto Santiago Apóstolo de Bos Aires vén desenvolvendo dende hai máis de 20 anos un traballo continuo no asentamento, potenciación e espallamento dos valores patrimoniais galegos dentro dun currículo parello ao dos centros asentados na Galicia territorial.
Este centro educativo, xestionado pola Fundación Galicia América (constituída pola Xunta de Galicia e o Centro Galicia de Bos Aires), desenvolve un proxecto educativo bicultural nos niveis inicial, primario e secundario e traballa co obxectivo primordial de brindar unha educación de calidade contrastada, elemento fundamental na promoción dunha escola que leva implícito o nome de Galicia fóra das fronteiras administrativas da Comunidade Autónoma.
Así, a custodia, difusión, reforzamento e desenvolvemento do patrimonio material e inmaterial galego en todos os campos e a oferta dunha educación aberta aos cambios que esixen os novos tempos son alicerces innegociables do centro educativo, piares básicos que sustentan todos os traballos cotiáns.