Co gallo das Letras Galegas 2024, Editorial Galaxia publica, en colaboración co Concello da Coruña, unha edición especial do poemario En concreto, de Luísa Villalta, con limiar de Estíbaliz Espinosa e fotografías de Xurxo Lobato.
Esta obra póstuma, no seu día merecente do XII Premio de Poesía Espiral Maior (2003), e Premio da Crítica de Galicia 2005, volve aos andeis literarios cunha nova mirada. Como Estíbaliz Espinosa afirma no limiar: “estamos ante un libro que é demolición construtora, que comeza e acaba co Vento – o mítico vento coruñés que non respecta paraugas nin peiteados -, que por acó roldaba antes da cidade e seguirá a soprar sen nós. Non proxecta un futuro distópico de Galicia mergullada, asoballada ou de Terra Deshabitada, senón que recupera a esperanza: os derradeiros ventos, os que pechan o portón do libro, son ‘ventos suaves que nunca máis se daban detido'”.
A poeta da cidade alta, a través dunha sensibilidade única, conxugando o sentido poético e musical, deixou un legado tras de si que hoxe seguimos celebrando. Este poemario é un exemplo de como a autora muda a perspectiva poética, a través dun traballo profundamente persoal, que xoga con diferentes fórmulas expresivas para amosar os paisaxes externos que forman parte da vida da autora. Unha fermosa homenaxe á súa querida Coruña.
Isto é tamén unha muller que resiste.
Palabra de Luísa.
Esta semana chegará a todas as librarías.
