Beiras recibe o Premio Trasalba 2009

Categoría: Nova

Reivindicación da nación. Memoria dos devanceiros. Río que nos continúa, dende os Ilustrados á Xeración Nós, dende Rosalía a Bóveda, Castelao, Ánxel Casal, Roberto Blanco Torres, Víctor Casas, Xurxo Lourenzo, Arturo Noguerol… O libro dos amigos. Adrián Solobio. Defensa da lingua e defensa da dignidade. Negación do conformismo. Chamamento a reaccionar. "Rexurdirá a nosa xente coma renacen os fentos no monte despois do incendio"… Xosé Manuel Beiras recibiu o domingo en Trasalba, na casa grande de Cimadevila, memoria de Ramón Otero Pedrayo, o Premio que esta Fundación concede anualmente a unha personalidade "comprometida coa lingua e a cultura galegas". Co auditorio da casa-museo a rebordar, a laudatio leuna o Presidente da Real Academia Galega, tamén Presidente de Honra da FOP, Xosé Ramón Barreiro. O homenaxeado respondeu cun texto que titulou "Gabanza e oración profana a don Ramón de Trasalba", de próxima publicación na revista GRIAL e que en breve incorporaremos tamén a estas páxinas.

Foi unha xornada chea de emocións e de vellas lembranzas: a familia, os amigos, os primeiros pasos na universidade, París, a loita antifranquista, o esforzo pola construción dun discurso organizado a prol da liberación nacional… Isaac Díaz Pardo ofreceu un ano máis o que el chama "a súa mamarrachada": debuxo orixinal co que agasalla ao homenaxeado, e a Fundación preparou o Libro dos Amigos, en edición especial, asinado por todos os seus compoñentes, e mais unha placa conmemorativa.

Para cerrar o acto, antes da audición tradicional das palabras de Otero Pedrayo, Tomás Camacho (guitarrista) e Luis Soto (frauta) interpretaron temas de E. Satie (Gymnopedie nº 1) e X. Montes (Negra Sombra) en homenaxe ao premiado. Máis de cincocentas persoas participaron no xantar colectivo que se celebrou no souto veciño da casa grande.

Comparte nas túas redes sociais ou por email