O pasado 28 de febreiro, na sala de actos da facultade de Filoloxía, en Santiago de Compostela, Armando Requeixo defendeu cos máximos honores a súa tese de doutoramento sobre Xosé María Diaz Castro, o autor de "Nimbos", a quen este ano a RAG dedicou o Día das Letras Galegas.
Xesús Alonso Montero, presidente da RAG, presidiu tamén o tribunal que valorou a tese, no que participaron tamén os profesores Arcadio Lopez Casanova da universidade de Valencia, Xosé María Dobarro da universidade da Coruña, Aurora López da universidade de Granada e Xosé Manuel Salgado, da USC, que actuou como secretario.
O traballo do profesor Armando Requeixo valora a obra de Díaz Castro no seu contexto histórico e a súa significación dentro da poesía galega contemporánea, na que "Nimbos" ocupa un lugar sobranceiro. Requeixo que preparou para Editorial Galaxia "Vida e obra de Díaz Castro" (Letras Galegas), publicará en breve na nosa editorial a "Poesía Galega Completa" do autor, o que o converte en principal especialista na obra do poeta de Guitiriz.
No noso blogue deixamos unha galería fotográfica, da autoría de Xabier Lama que reflicte varios intres da xornada.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR