Xavier Senín presenta en Vilagarcía o seu novo libro ás 20.00h, O alfaiate portugués. Estará acompañado polo tamén escritor Xabier P. Docampo e por Carlos Lema pola Editorial Galaxia.
Son un conxunto de relatos curtos, noventa, que contan unha realidade próxima, afincada nas paisaxes, anécdotas e tipos humanos da cultura tradicional. Un universo popular que alenta na memoria e na xeografía dos afectos. Un mundo vizoso, próximo e así e todo distante. Case descoñecido. Lobeira é o espazo narrativo de Xavier Senín, territorio máxico onde se desenvolve a meirande parte destas historias. A do alfaiate que vén das terras tramontanas de Portugal rodeado de misterio e que co mesmo misterio desaparece. A do cobrador da luz que percorre de a cabalo as parroquias e a do sancristán que dá concertos de campás e arroutadas de sineta no momento da consagración. A do organista que toca “Yesterday” na misa do Corpus. Un territorio no que fumega a cunca de chocolate das señoritas da vila. Onde perdura o recendo inesquecible do pan quente no forno e a onde seguen a chegar as cartas dos emigrados. Un mundo que está próximo, moito máis do que parece, e que asemade foxe de nós coma unha presada de auga entre os dedos.
Para a xente máis nova falamos dun mundo perdido, de cando chegaron os televisores, de cando viña o cobrador da luz, do organista da igrexa, das festas de antes… e dese mundo non hai tanto…
Mañá teredes oportunidade de escoitalo, pero tamén nesta entrevista que lle fixeron no Zigzag da Televisión de Galicia.
Menu
Menu
