Benigno Campos naceu en Chapela. Durante 39 anos traballou nunha empresa da construción naval. Foi en Madrid, no ano 1971, mentres estaba a cumprir o servizo militar, cando comezou a afeccionarse á cociña grazas a súa amiga Tonina, tamén de Chapela.

Esta afección levouno a ser un dos integrantes do exitoso programa de cociña da Televisión de Galicia Larpeiros. Co seu libro de receitas, A cociña de Larpeiros, pretende cumprir coa demanda dun gran número de seguidores do programa. Publicou moitos outros títulos, entre os que destacan os seguintes: Novas receitas da cociña de Larpeiros (2010), Onde mercan os Larpeiros (2011), Volve a cociña de Larpeiros (2010), Cociñando con Benigno Campos (2014) e Peixes e mariscos. As receitas de Benigno Campos (2016).