Grial 173

VV.AA.

Lectura pública. Un dereito da cidadanía

As bibliotecas e a infraestrutura da sociedade lectora ocupan a primeira liña de información e debate.

Galicia segue a ocupar os postos máis baixos respecto de índices de lectura e usos bibliotecarios. Aínda que algo se ten mellorado e a nova administración da Xunta anuncia programas de activación e investimentos económicos, as bibliotecas seguen sendo unha asignatura pendente na nosa estratrexia cultural. O informe elaborado por Hilario Hernández, da Fundación Germán Sánchez Ruipérez, un dos primeiros especialistas en lectura pública en Europa, resulta certamente esclarecedor. Cómpre unha política decidida a prol dun mellor e maior equipamento de recursos, dotación de persoal especializado, actualización de fondos, etc. Sen sociedade lectora non hai opcións na nova Sociedade da Información e o Coñecemento.

Especialistas e técnicos cualificados colaboran neste monográfico de GRIAL, coordenado por María Dolores Cabrera e Víctor F. Freixanes: Cristina Novoa, especialista en bibliotecas escolares; Isabel Blanco, presidenta de ANABAD-Galicia e directora das bibliotecas municipais da Coruña; María Luz Corral, bibliotecaria municipal en Oleiros (A Coruña); Pedro Lucas, responsable da Biblioteca da Fundación Caixa Galicia en Santiago de Compostela, e Francisco Castro, escritor e animador cultural, abordan dende distintas perspectivas o mesmo problema. O punto de vista da Administración pono neste caso o director xeral de Creación e Difusión Cultural da Consellaría de Cultura da Xunta de Galicia, Luis Bará.

O número de GRIAL sae aos poucos meses de terse aprobado por unanimidade no parlamento galego a Lei do Libro, cun compromiso por parte da Consellería de Cultura de dotar económicamente a infraestrutura bibliotecaria galega. Está en proceso de elaboración a Lei de Bibliotecas de Galicia que, xunto co Plan de Animación Lectora, constitúen un punto de esperanza para os novos tempos. O número compleméntase cunha cumprida entrevista ao ensaísta arxentino Alberto Manguel, realizada polos compañeiros de redacción Dolores Vilavedra e Carlos Lema.

Ademais das seccións habituais da revista, GRIAL ofrece nesta entrega un documento de excepcional valor histórico: un informe que a policía franquista elaborou a primeiros dos anos 70 sobre o movemento "Voces Ceibes", rescatado dos arquivos policiais polo historiador Xan Fraga, e redactado no seu día nas comisarías da cidade da Coruña. O informe, con nomes e apelidos dos principais protagonistas, constitúe unha interesantísima radiografía daquel primeiro gromo político cultural, observado dende a perspectiva da policía do réxime de Franco.

A maiores, Bieito Romero, fundador e compoñente do grupo Luar na Lubre, ofrécenos unha documentada panorámica sobre a música galega na emigración. A sección de Creación ocúpana nesta ocasión un poeta, Rodríguez Baixeras, na actualidade residente en Salvador de Bahía, e unha fotógrafo, Paula Mariño.

Recensións


Detalles

  • Páxinas : 152
  • Deseño : Rústica
  • Dimensións : 18,5 x 27 cm
  • Data Publicación : 2007-04-18
  • Colección : Grial
  • Editorial : Galaxia
  • ISBN :
  • Edición : 1

Noticias relacionadas



Actividades relacionadas


Novidades

Taracea marroquí 1935Eduardo Blanco Amor
Obra dramáticaÁlvaro de las Casas
Ensaios sobre GaliciaXohán Vicente Viqueira
Os camiños da vidaRamón Otero Pedrayo

VV.AA.,


Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR