O venres 24 de abril, ás 18:00 horas, celebrarase no Quiosco Sequeiros (Avenida das Camelias, 103, Vigo) o Escape Room Galáctico: Asalto á Estación Espacial Dinoseto, unha actividade inspirada no universo da novela Odio, de Gabriel Romero de Ávila.
A proposta convida ás persoas participantes a mergullarse nunha misión ambientada nun conflito entre humanos e droides. A Estación Espacial Dinoseto está a piques de caer á Terra e un grupo de mercenarios deberá acceder aos seus segredos antes de que sexa demasiado tarde.
Ao longo do xogo, os asistentes terán que resolver códigos, descifrar mensaxes e seguir distintas pistas por localizacións próximas, ata chegar á clave final, agochada nas páxinas da propia novela.
A actividade está dirixida a maiores de 12 anos e contará cun máximo de 20-25 participantes.
O Quiosco Sequeiros establecerá unha reserva de 5 euros para participar, importe que se descontará do prezo da novela no caso de adquirila durante o evento.
